හූති කැරලිකරුවන් විසින් සෞදියේ, රියාද් අගනුවර ඉලක්ක කරමින් එල්ල කරනු ලබන ප්‍රහාරයන් හමුවේ ආරක්ෂිත පියවරක් ලෙස ශ්‍රී ලංකන් ගුවන් සේවය ගුවන් වාර කිහිපයක් අවලංගු කර තිබෙනවා.ඒ අනුව සෞදියේ රියාද් අගනුවර වෙත සිදුකරනු ලබන UL 265 ගුවන් ගමන්වාරය අවලංගු කිරීමට කටයුතු කර ඇති බව සඳහන්.එමෙන්ම හෙට අළුයම දිවයිනට පැමිණිමට නියමිත UL266 රියාද් සිට කොළඹ දක්වා සිදුකරනු ලබන ගුවන්වාරය ද අවලංගු කර තිබෙනවා.
බන්ධනාගාර ආඥා පනත යටතේ සාදන ලද නීති රෙගුලාසි සහ නිත්‍ය නියෝග යාවත්කාලීන කිරීමට ජනාධිපති අනුර කුමාර දිසානායකගේ උපදෙස් පරිදි විශේෂ කමිටුවක් අද (08) පත්කර තිබෙනවා.ත්‍රෛනිකායික මහා සංඝරත්නය සහ ජනාධිපති අනුර කුමාර දිසානායක අතර පැවති විශේෂ සාකච්ඡාවේදී එළැඹි තීරණයට අනුව මෙම කමිටුව පත් කර තිබෙන බව සඳහන්.බුද්ධශාසන, ආගමික සහ සංස්කෘතික කටයුතු අමාත්‍යාංශයේ ලේකම් ප්‍රීන්ස් සේනාධීර, අධිකරණ සහ ජාතික ඒකාබද්ධතා අමාත්‍යාංශයේ අතිරේක ලේකම් පියුමන්ති පිරීස්, රාජ්‍ය පරිපාලන, පළාත් සභා සහ පළාත් පාලන අමාත්‍යාංශයේ අතිරේක ලේකම් වසන්ත ආරියරත්න, බෞද්ධ කටයුතු කොමසාරිස් ජනරාල් ආර්.එම්.ජී. සේනාරත්න සහ බන්ධනාගාර දොපාර්තමේන්තුවේ කොමසාරිස්වරයෙකු වන ඒ.සී. ගජනායක මෙම කමිටුවට අයත්. බන්ධනාගාර ආඥා පනතේ නීති රෙගුලාසි සහ ආඥා පනත මගින් පනවන ලද නිත්‍ය නියෝග කාලානුරූපීව සමාලෝචනය කිරීම සහ වර්තමාන ආගමික, සංස්කෘතික, නීතිමය, පරිපාලනමය සහ ප්‍රායෝගික අවශ්‍යතාවන්ට අනුකූල වන පරිදි යාවත්කාලීන කිරීමේ අවශ්‍යතාව සැලකිල්ලට ගනිමින් මෙම කමිටුව පත්කර තිබෙනවා.මේ අනුව බන්ධනාගාර පද්ධතියේ කාර්යක්ෂමතාව, යහපාලනය, ආරක්ෂාව, සංස්කෘතික වටිනාකම් සහ නීතියේ ආධිපත්‍යය ශක්තිමත් කිරීම සඳහා අවශ්‍ය සංශෝධන හඳුනාගෙන නිර්දේශ ඉදිරිපත් කිරීම මෙම කමිටුව වෙත පැවරෙනවා.
මහජනතාවට ආර්ථික සහනයක් සැලසීමේ පියවරක් ලෙස ඉදිරි වසර දෙකත් තුනත් අතර කාලය තුළ එකතු කළ අගය මත බද්ද (VAT) ප්‍රමාණය අඩු කිරීමට රජය බලාපොරොත්තු වන බව ජනාධිපති අනුර කුමාර දිසානායක පවසනවා.අද (08) අරලියගහ මන්දිරයේදී නව ග්‍රාම නිලධාරීන් 1,540 දෙනෙකු වෙත පත්වීම් ලිපි ප්‍රදානය කිරීමේ උත්සවයට එක්වෙමින් ජනාධිපතිවරයා මේ බව සඳහන් කළා.වැඩිවන රාජ්‍ය වියදම් කළමනාකරණය කරගනිමින්, ජනතාව මත පටවා ඇති බදු බර ලිහිල් කිරීමට රජය කටයුතු කරමින් සිටින බවයි එහිදී ජනාධිපතිවරයා පෙන්වා දුන්නේ."අපගේ අරමුණ ඉදිරි වසර දෙක තුන තුළ එකතු කළ අගය මත බද්ද (VAT) අඩු කර ජනතාවට සහන සැලසීමයි," යනුවෙන් ජනාධිපතිවරයා එහිදී සඳහන් කළා.එමෙන්ම අත්‍යවශ්‍ය අධ්‍යාපනික උපකරණ සහ පොත්පත් මත පනවා ඇති බදු ඉවත් කිරීමේ අවශ්‍යතාව ද ජනාධිපතිවරයා මෙහිදී අවධාරණය කළ අතර, දරුවෙකු අධ්‍යාපනය සඳහා පොතක් මිලදී ගැනීමේදී බදු බරක් දැරීමට සිදු නොවිය යුතු බවත්, එවැනි බදු ඉවත් කළ යුතු බවත් ඔහු සඳහන් කළා.කෙසේ වෙතත්, රාජ්‍ය සේවකයින්ගේ වැටුප් වැඩිකිරීම් ක්‍රියාත්මක කරන අතරතුර බදු අඩු කිරීම සඳහා රජයේ වියදම් ඉතා ප්‍රවේශමෙන් කළමනාකරණය කළ යුතුව ඇති බව ද ජනාධිපතිවරයා පැවසූ අතර, රාජ්‍ය අංශයේ මුලික වැටුප අදියර තුනකින් වැඩි කිරීමට ගත් තීරණය හේතුවෙන් 2027 වන විට රුපියල් බිලියන 330ක අමතර වියදමක් දැරීමට සිදුවන බව ද මෙහිදී පෙන්වා දුන්නා.
නව යතුරුපැදි ලියාපදිංචිය දිවයිනේ දිත්‍රික්ක පහකදී ලබන 19 වැනිදා සිට ආරම්භ කරන බව මෝටර් රථ ප්‍රවාහන කොමසාරිස් ජනරාල්, විශ්‍රාමික එයාර් වයිස් මාෂල් තුෂාර ඉඳුනිල් ප්‍රනාන්දු සඳහන් කළා.අවශ්‍ය මූලික දැනුවත් කිරීම් සිදු කිරීමෙන් අනතුරුව, යාපනය, හම්බන්තොට, අනුරාධපුර, කුරුණෑගල සහ ගම්පහ යන දිස්ත්‍රික් කාර්යාලවලදී එලෙස නව යතුරුපැදි ලියාපදිංචි කිරීම ආරම්භ කරනු ඇති බවයි මෝටර් රථ ප්‍රවාහන කොමසාරිස් ජනරාල්වරයා පැවසුවේ.මූලික අදියරේදී යතුරුපැදි ලියාපදිංචිය පමණක් මෙලෙස ආරම්භ කරන බවත්, පසුව එය සියලු මෝටර් රථ ලියාපදිංචිය දක්වා විහිදුවාලීමට බලාපොරොත්තු වන බවත් මෝටර් රථ ප්‍රවාහන කොමසාරිස් ජනරාල්වරයා හිරු ප්‍රවෘත්ති අංශය කළ විමසීමකදී වැඩිදුරටත් සඳහන් කළා.
පුත්තලම - කල්අඩි ප්‍රදේශයේ විදුලි උපපොළක තඹ කම්බි කපා සොරා ගැනීමට පැමිණි පුද්ගලයෙකුට එහි මුරකරු විසින් වෙඩි තබා තිබෙනවා. පොලිසිය සඳහන් කළේ, රිපිටර් වර්ගයේ ගිනි අවියකින් අද (08) අළුයම මෙම වෙඩි තැබීම සිදු කර ඇති බවයි. වෙඩි වැදීමෙන් තුවාල ලැබූ සැකකරු මේ වන විට ප්‍රදේශයෙන් පළා ගොස් ඇති අතර, ඔහු මෙතෙක් අත්අඩංගුවට ගෙන නැහැ.
